Kitab dalem isu Kenyah

Tai taup tau kenem re sio 5/3/2011, jane ca tau ja atek tiga me mung ilu da un mencam isu Kenyah. Oban sio tau ji ilu lepa nakaw kado kitab dalem isu Kenyah jak senganak le lepa translate ke dalem isu le Kenyah. Un ne dalem pat ato lema pulo'(450) osah nai naat kita pemoyan tiga ji ke Gerija SIB Bukit Kanada Miri. Ading-ading beng ca tuak le sorat ja ida sokat translate naki, dalem kabien ja kenai ida sokat ke metuk gayeng tiga ji apan kitab telu un tai tenup kise' e. Naki ida lepa translate sorat/tolat dalem kitab isu jane kitab genesis/kejadian dalem isu ilu jane kitab Tading. Tiga ale neji odai oban un ne kita gayeng telu dalem isu le ja lan naki odai. Nyat telu mung sokat nolong ida dalem temame' ngan nolong ida pasat inu ji la-a dalem cara mencai sin belanja re ti gayeng kidi la-a.

Atek tiga ale teka' pecap isu lan ilu Kenyah le kaie senganak, naat ne kumin oban atek-atek sik isu le Kenyah ne. Malap ilu tai lopaw kidi bayak te. Lega ca kitab ji jane pulo' ligit tuak. Nyat ilu mung da mung mencam ngan kelo ke pekalai isu Kenyah un meli ngan nyekapang se tengayet re telu ke mete' isu le Kenyah ke daleh Sarawak ne. Ayen photocopy Kitab telu apan un lote bang re telu oban oyan sorat/kitab ji me ilu. Tiga peremun sorat ji tiga-tiga apan un lote je ilu ke menok kidi bayak te o-o. Tiga tawai, Tuhan ja lemoto majak pengudip le mung. Amin.